Komandi sunnudag fara HB og TB at takast í Gundadali. Bæði liðini liggja jøvn á stigatalvuni við 5 stigum hvør. Byrjanin hjá HB hevur verið eitt sindur misjøvn, men við sigrinum í Klaksvík, og tá TB kemur á vitjan, ætlar HB sær uttan iva at fáa glið á kappingina. HB vann ein tiltiknan ”HB-sigur” móti KÍ, har teir ikki gjørdu meira enn neyðugt. Gamaní, hevði KÍ nógvar møguleikar, men HB er einaferð HB, og teir duga væl at vinna torførar dystir.
TB hevur mistrivist í Gundadali í ein hálvan mansaldur. Seinast TB vann móti HB var í 1991. Tá vann felagið 2-1, tað var Jón Johannesen ið skoraði bæði málini fyri TB í tí dystinum. Eftir hetta hevur gingist stak illa í hond, men TB hevur víst í ár, at tað kann gera nøkur gleps og vónandi kann TB bøta um ringu hagtølini móti HB á útivølli sunnudagin. Trøini veksa ikki inn í himmalin, og bert tí at TB hevur fingið 2 javnleikir í torførum umstøðum og vunnið á Eiðinum, mugu menn gera sær greitt, at HB í Havnini er torførasta útivallaruppgávan í Føroyum. Hjá okkum kemur onki av sær sjálvum, menn mugu vísa góðan stríðsvilja og hugburð fyri at tað skal røkka til stig í Gundadali. Tað gleðiliga fyri TB er, at Adu er klárur aftur eftir leikbannið, hann fekk móti KÍ. Annars, eru allir mans tøkir til dystin.
Heimasíðan ynskir øllum ein góðan dyst sunnudagin.