Av og á er hugaligt at líta aftur í søgubøkurnar, hetta var serliga uppi, tá heimasíðan Tíðarrit (Tidarrit.fo) var nýggj. Vit hava verið eitt legg aftur í tíðina, tá ikki serliga nógv lið vóru at kappast um gullkrónurnar.
Í 1952 vóru fimm lið í bestu føroyski deildini; B36, HB, KÍ, TB og VB. Hyggur ein inn á FaroeSoccer, so stendur TB sum nr 1, men tíverri er endaligi sannleikin ein annars, KÍ gjørdist FM-vinnari hetta árið. Árið fyri vann TB sannførandi, men frá 1952 og tey næstu árini var tað KÍ, sum var omaná og vunnu trý ár á rað.
Eftir nútíðar uppgerð av stigatalvuni er tað eisini rætt sum FaroeSoccer skrivar, men í 1952 var uppgjørt á annan hátt. Nevniliga var málkvotientur brúktur, sum tað bleiv nevnt í bløðunum tá. Eitt annað orð er mál-deildtal.
Endaliga støðan í 1952
| Nr | Lið | D | V | J | T | VM | TM | Mál +/- | Stig | Mál-deildtal | Í desimalum |
|---|---|---|---|---|---|---|---|---|---|---|---|
| 1 | KÍ | 8 | 7 | 0 | 1 | 21 | 6 | 15 | 14 | 3 1/2 | 3,50 |
| 2 | TB | 8 | 7 | 0 | 1 | 24 | 7 | 17 | 14 | 3 3/7 | 3,43 |
| 3 | HB | 8 | 3 | 0 | 5 | 10 | 17 | -7 | 6 | 10/17 | 0,59 |
| 4 | VB | 8 | 1 | 2 | 5 | 7 | 21 | -14 | 4 | 1/3 | 0,33 |
| 5 | B36 | 8 | 0 | 2 | 6 | 3 | 14 | -11 | 2 | 3/14 | 0,21 |
Mál-deildtali sum var brúkt at rokna út hvør endaði, sum FM-vinnari er soljóðandi: Mál-deildtal = Mál vunnin / Mál ímóti. Altso við øðrum orðum, hvussu nógvar ferðir fleiri mál eitt lið hevur skotið í mun til, hvussu nógv eru latin inn.
Í 1952 var tað sera tætt, tí sum sæst, so hevðiTB skotið 24 mál og latið 7 inn t.e. eitt mál-deildtal á 3 3/7 (3,43). KÍ hinvegin hevði skotið 21 mál og latið 6 mál inn, sum gevur eit mál-deildtal á 3 1/2 (3,5).
Tað sum er áhugavert er, at um TB hevði gjørt eitt mál meira í ein av átta dystunum, so fór gulli til Tvøroyrar.
Toppskjútti í 1952 gjørdist ein ávísur Mervyn Dimon sum skjeyt seks mál.
Annars vóru sjálvsagt tvær grannauppgerðir í Suðuroynni og báðir dystir endaðu við TB sigri, tann fyrri ein 2-0 sigur í Vági og heima vundu vit burturúr vágbingum heili 6-0.
Í 1952 vóru átta dystir leiktir og givin vóru tvey stig fyri sigur og eitt fyri javnleik.
Sí annars TB-hópin í 1952 við at fylgja hetta leinkið til FaroeSoccer.
Myndin er tilvildarliga eftirgjørd.
Keldur
Tidarrit.fo (Dagblaðið 19/8/1952)
Faroesoccer.com