Tórskvøldið 2. februar kl. 20:00 verður spennandi fundur á Seglloftinum. Tað er nevndin í Tvøroyrar Bóltfelag, ið hevur tikið stig til at hava ein kunnandi fund, um felagið og tess ætlanir fyri komandi kappingarár. Sum flestum kunnugt, so hevur TB vunnið seg upp aftur á ovastu føroysku fótbóltsrók, og avbjóðingarnar eru øgiligar, skal felagið gera sær vónir, um at vinna sær fast undir føtur aftur í deildini.
Ynskja at kunna um ætlanirnar
TB vil fegin at fólk skulu vita eitt sindur um hvørjar ætlanir felagið hevur, og hvat krevst fyri at náa hesar ætlanir, bæði av nevndum, íðkarum og sjálvbodnum. André Dalfoss, formaður fer at siga nøkur orð fyri nevndina í TB, og hevur hann eisini fingið nýggja venjaran, Milan Culjic at taka orðið. Milan fer at greiða eitt sindur frá hópinum í ár, og um hvørji mál hann, sum venjari og spælararnir hava sett sær. Útlendsku spælararnir koma til býin sama dag, og vænta vit at teir verða til staðar, saman við restini av hópinum. Umboð fyri ungdómsdeildina verða eisini við, og hava fólk spurningar, eru teir vækomnir.
